‘Njeriu i momentit’, kështu mund të shpejgohet momentalisht emri i Jasir Asanit tek Shqipëria.

Një futbollist i jashtëzakonshëm nga Shkupi, Asani është kthyer në ‘idhull’ të tifozëve shqiptarë pas paraqitjeve të tij fantastike në këto kualifikuese me fanellën kuq e zi.

Pavarësisht se disa futbollistë nga ajo zonë kanë zgjedhur të përfaqësojnë Maqedoninë e Veriut, Jasir Asani ishte i vendosur që të përfaqësonte fanellën e bukur të kombëtares, me të cilën edhe po shkëlqen në çdo aspekt.

Super gol i realizuar ndaj Moldavisë, asistim fantastik ndaj Ishujve Faroe, lojë e bukur dhe atraktive, dinamikë në sulm dhe gjithçka tjetër ka dhuruar futbollisti nga Shkupi, me shpresat e shqiptarëve që janë në maksimum për të qenë edhe njëherë pjesë e historisë, pjesë e Kampionatit Evropian.

Në një intervistë ekskluzive për ‘GazetaBlic Sport’, pas dy fitoreve radhazi të siguruara, Jasir Asani tha se po japin shpirtin në fushë për siguruar rezultate sa më të mira dhe se të gjitha janë bashkë në qëllimin e tyre drejt Gjermanisë.

“Normalisht, ne kemi një ekip të ri me cilësi të madhe dhe unë dhe bashkëlojtarët do të japim shpirtin në fushë për të arritur ëndrrën evropiane, të gjithë jemi gati të japim maksimumin. Fituam 2 ndeshje shumë mirë, kemi një trajner fantastik që na motivon shumë çdo ditë. Një trajner i madh si Sylvinho dhe i gjithë stafi na japin mbështetje të madhe. Jemi të gjithë bashkë për një qëllim drejt Gjermanisë“, tha fillimisht Asani.

Më pas, ai tha do të tentojë të vazhdojë paraqitjet e mira dhe ishte shumë optmist që do të shënojë edhe shumë gola të tjerë në ndeshjet e radhës. Asani poashtu kishte një kërkesë për tifozët që të vazhdojnë me përkrahje të tillë masive, drejt misionit të madh, kualifikimit në ‘Euro2024’.

“Unë jam duke bërë punën time, dua të ndihmoj kombëtaren të ketë sukses, jam i lumtur që fitojmë, do të jap shpirtin tim në fushë për të vazhduar kështu, kemi një ekip të mirë, të fortë dhe me siguri do të shënoj sa më shumë gola në ndeshjet e radhës. Të gjithë duhet të na mbështetin, sepse jemi në rrugën e duhur për të bërë histori, ju pres të gjithëve në stadium, kemi nevojë për tifozët shqiptarë anë e mbanë botës“, përfundoi Asani.