Granit Xhaka ka mohuar zërat se gruaja e tij ishte arsyeja që ai u largua nga Arsenali për Bayer Leverkusen këtë verë.

Mesfushori 30-vjeçar u largua nga Emirates pasi pati afro 300 paraqitje për Topçinjtë, duke iu bashkuar skuadrës së Bundesligës.

Duke folur për Keystone-SDA, Xhaka hodhi poshtë pretendime të tilla.

“Kishte spekulime gjithandej se gruaja ime nuk ishte më e lumtur në Angli. Kjo nuk është aspak e vërtetë,” tha Xhaka.

“Fakti është se si person jam gjithmonë i interesuar për sfida të reja, pas shtatë vitesh ka ardhur koha për diçka krejtësisht të re.

“Liga nuk është e re, por klubi është. Gjatë bisedimeve me Simon Rolfes [drejtorin sportiv] dhe Xabi Alonso, ndjeva se projekti afatgjatë në Leverkusen ishte i vlefshëm dhe se ishte 100 për qind në përputhje me mua.”

Xhaka shtoi se respekti i tij për ish-shefin Arteta është i madh.

“Ai është një trajner që kupton një sasi të jashtëzakonshme të futbollit,” tha ai.

“Dikush që e sheh futbollin me sy krejtësisht të ndryshëm.

“Kam pasur një marrëdhënie të shkëlqyer me të. Falë tij, ne arritëm atë që na mungonte për vite me radhë: Ligën e Kampionëve”, përfundoi ai.