Kualifikueset e EURO 2024 janë mbyllur sot me ndeshjet e fundit në fazën në grupe, ndërsa mbeten për t’u luajtur vetëm sfidat play-off në muajin mars të vitit të ardhshëm. Shqipëria e ka mbyllur me sukses, duke fituar grupin e saj dhe siguruar biletën për në Gjermani.

Në këtë edicion, ajo ka vendosur rekordin e pikëve, me 15 të tilla në turne, ndërsa rezulton tashmë se ka një nga mbrojtjet më të mira të kualifikuesve. Kuqezinjtë kanë pësuar vetëm 4 gola në ndeshjet e tyre dhe kjo i bën ata të kenë mbrojtjen e tretë më të mirë të kualifikueseve. Vetëm  Portugalia me 2 gola dhe Franca me 3 kanë regjistruar statistika më të mira në prapavijë. Bashkë me Shqipërinë në kuotën e 4 golave janë edhe Anglia, Kroacia e Belgjika.

Sa i përket sulmit, ai nuk renditet ndër më të mirët e turneut, pasi është i 26-ti mes 54 ekipeve pjesëmarrëse në këtë edicion, me 12 gola të shënuar në 8 ndeshje, edhe për shkak të faktit se Grupi E ka qenë ndër më të ekuilibruarit e eliminatoreve.