Tirana dhe Laçi kanë ndarë pikët mes tyre me një barazim dramatik në ndeshjen e luajtur në Korçë.
Në fakt ka qenë një ndeshje me shumë pak ritëm, ku dy skuadrat kishin më shumë frikë të mos pësonin gol, duke u hedhur rrallëherë me shumë forca në sulm.
Bardheblutë ishin ata që krijuan rastet më të mira në pjesën e parë dhe ia dolën të gjenin rrjetën me Zharmuni. Më pas, në pjesën e dytë ata kërkuan të administronin shifrat dhe i lëshuan terren Laçit që u hodh në kërkim të barazimit.
Kurbinasit nuk dukej se kishin forcën për të tundur rrjetën por një ndihmë ua dha pikërisht Zharmuni i cili në fund të ndeshjes, në minutën e fundit shtesë, devijoi në mënyrë të pafat para portës, duke shkaktuar autogolin i cili vulosi barazimin përfundimtar 1-1.
TIRANA 1-1 LAÇI
40′ Zharmuni / 90’+6′ (ag) Zharmuni
NGJARJET KRYESORE
90’+8’ Mbyllet ndeshja me barazimin 1-1.
90’+6’ GOOOL LAÇI! Pas një tjetër goditje këndi, topi kthehet nga Kurti në qendër ku Zharmuni e devijon në portën e tij. (VIDEO)
90’+4’ Pas një goditje këndi, lojtarët e Laçit kërkojnë prekje topi me dorë në zonë, por gjyqtaria vazhdon lojën.
90′ Jepen 6 minuta shtesë.
87’ Manellari i lë vendin Kryeziut në radhët e Laçit.
83’ Ndreca merr vendin e Prengajt në radhët e Tiranës.
78’ Pas një goditje nga këndi, Kurti me kokë i afrohet golit por çon sferën jashtë ngjitur me shtyllën. (VIDEO)
78’ Haxhiu i lë vendin Micit në radhët e Tiranës.
72’ Meta nuk mund të vazhdojë më për shkak problemesh fizike, duke i lënë vendin Jakut në fushë.
67’ Ismajli provon edhe një herë nga distanca, përsëri pa shënjestrën e duhur për të shqetësuar Dajsinanin.
59’ Protesta të kurbinasve për një kontakt mes Prodanit dhe Gjumsit në zonë, gjyqtari bën shenjë që loja të vazhdojë. (VIDEO)
57’ I sapofuturi në fushë Boçka ndëshkohet me karton të verdhë.
54’ Papa, Tresa dhe Kofi i lënë vendin në fushë Bibos, Bullarit dhe Boçkës.
53’ Melo harkon në mënyrë perfekte në zonë për Kofi, i cili para portës nuk ia del të mposhtë Selmanin
50’ Haxhiu ekzekuton direkt në portë një goditje dënimi nga e majta, Dajsinani grushton sferën. (VIDEO)
49’ Lleshi ndëshkohet me karton të verdhë pas një faulli ndaj Soler.
46’ Nuk ka zëvendësime në fillimin e pjesës së dytë, rinis ndeshja.
45’+3’ Mbyllet me avantazhin 1-0 të Tiranës pjesa e parë.
45’ Jepen 3 minuta shtesë.
40’ GOOOL TIRANA! Pas një aksioni të Haxhiut nga e djathta, pasimi në qendër gjen Zharmuni i cili tund rrjetën me devijimin e tij. (VIDEO)
35’ Ismajli provon edhe ai me një gjuajtje nga distanca të gjejë portën, por shënjestra është shumë e gabuar.
33’ Papa sheh daljen e Selmanit dhe provon të gjejë golin nga mesfusha, por topi shkon jashtë katërkëndorit të bardhebluve.
31’ Pas një goditje dënimi, Dembele provon nga e majta, por nuk gjen portën. (VIDEO)
28’ Manellari ndëshkohet me karton të verdhë pas një faulli ndaj Soler. Ka pak nervozizëm në fushë dhe përplasje mes lojtarëve. Janë Tresa dhe Ismajli të cilët përfundojnë edhe ata në listën e lojtarëve të ndëshkuar me të verdhë.
24’ Pas zhvillimit të një goditje nga këndi, topi shkon te Tresa i cili gjuan nga jashtë zonës, por fluturon sferën shumë lart mbi traversë.
21’ Dembele është i ndëshkuari i parë me karton të verdhë.
17’ Shumë faulle radhazi të skuadrave që në këto minuta bllokojnë çdo aksion të kundërshtarëve.
12’ Melo nga e majta harkon një goditje dënimi rrezikshëm në zonë, Selmani grushton dhe largon sferën.
9’ Kofi nga e majta shmang dy mbrojtës dhe gjuan, por sfera shkon direkt në duart e Selmanit. (VIDEO)
7’ Shkëndija e parë është e Tiranës me Haxhiun i cili pas një kombinimi me Metën gjuan por nuk gjen portën falë një devijimi. (VIDEO)
4’ Ritëm i ulët në startin e ndeshjes, me ekipet që janë shumë të kujdesshme për të mos pësuar një gol të shpejtë.