Ashtu siç edhe ishte folur përgjatë gjithë ditës, Rodri është fituesi i “Topit të Artë 2024”. Spanjolli i Manchester Cityt ka lënë pas në garë tre yjet e Real Madrid, Vinicius Junior, Dani Carvajal dhe Jude Bellingham.

Trofeu iu dorëzua Rodrit nga një legjendë botërore si Xhorxh Ueah, ish-futbollisti legjendar i Milanit.

Kujtojmë që ishin pikërisht zërat se fituesi i “Topit të Artë” ishte paracaktuar, arsyeja se përse Real Madrid bojkotoi ceremoninë që u zhvillua në Paris.

Po ashtu Real Madrid u shpall skuadra më e mirë e vitit, Emiliano Martinez mori çmimin “Lev Jashin”, ndërsa Jamine Yamal u shpall lojtari më i mirë nën 21 vjeç.

Po ashtu kjo mbrëmje ishte mjaft e veçantë edhe për Shqipërinë, pasi një futbollist me gjak shqiptar si Granit Xhaka u rendit si futbollisti i 16-të më i mirë në botë.

Ndërkohë çmimi i golashënuesit më të mirë u nda mes Harry Kane dhe Kylian Mbappe. /Vizionplus.tv/