Vllaznia mori një fitore të artë në transfertë përballë Tiranës, në supersfidën e vlefshme për javën e 11-të të Superiores.

Klasikja e Shqipërisë e zhvilluar në stadiumin “Roza Haxhiu” të Lushnjës, përfundoi 3-4 në favor të shkodranëve. Pas kësaj sfide ka folur kapiteni dhe autori i dy golave për Vllazninë, Bekim Balaj.

“Sigurisht që për mua është e rëndësishme të shënoj, pasi si sulmues golat janë të rëndësishëm. Por më vlerë kanë pikët dhe fitorja e Vllaznisë. Arrita të shënoj, 3 pikët, perfekte për ne. Nuk kam bërë përzgjedhje kujt i shënoj, por derbi i Shqipërisë është një ndeshje e luftuar.

Golat janë të njëjtë për mua, si kundër Tiranës e kujt tjetër. Me Esat Malën jo vetëm unë, por çdo lojtar ndihet mirë. Ai është një lojtar që krijon hapësira, shënon, asiston dhe është deçiziv”, tha Bekim Balaj.