PSG është si “fuçia baruti”, që mund të shpërthejë në çdo moment. Një nga yjet më të kontestuar dhe sulmuar nga ultrasit e skuadrës franceze është Neymar Júnior.
Futbollisti brazilian iu është përgjigjur përmes rrjeteve sociale fyerjeve që pësoi dje në rezidencën e tij luksoze në Paris, kur disa qindra ultras ia mësynë aty dhe kërkuan largimin e tij nga klubi francez.
Neymar ka postuar mesazhin e mëposhtëm në Instagramin e tij: “Mos lejoni që të tjerët t’ju futin në stuhinë e tyre, futini në paqen tuaj”. Një tekst që mund të lexohej nga 208 milionë ndjekësit e brazilianit në rrjetin social.
Kjo ishte përgjigja e lojtarit për një të mërkurë veçanërisht të stuhishme te PSG. Ultrasit fillimisht u morën me Leo Messin, e quajtën atë në kor “bir kur*e”, pasi u takuan në dyert e zyrave të klubit parizien. Më pas shkuan në shtëpinë e Neymarit për t’ia treguar hapur pakënaqësinë e tyre.
PSG i dënoi këto akte përmes një deklarate: “PSG dënon me vendosmëri aktet dhe fyerjet e patolerueshme të një grupi të vogël individësh, që kanë ndodhur këtë të mërkurë. Sido që të jenë dallimet, asgjë nuk mund t’i justifikojë këto akte. Klubi tregon mbështetjen e vet për lojtarët, menaxherët dhe të gjithë të shqetësuarit nga këto sjellje të turpshme”.
