Edhe pse luan me Teutën e vendit të fundit në renditje, Egnatia pritet të ketë një transfertë të vështirë, pasi durrsakët kanë rezultuar gjithmonë “kockë e fortë” për rrogozhinasit. Në konferencën për shtyp para ndeshjes trajneri i Egnatias, Edlir Tetova u shpreh se ka ardhur momenti të thyejnë tabunë e rezultateve me Teutën.

Tetova, përballë do të keni Teutën, me të cilën nuk keni fituar asnjëherë, çfarë prisni nga ky duel?

Jemi vetëdijshëm që do të jetë një ndeshje e vështirë, pasi Teuta na ka vendosur gjithmonë në vështirësi. Jam i kënaqur me performancën e skuadrës gjatë javës në stërvitje dhe në këto kushte, do të futemi në fushë për maksimumin me qëllim për të vijuar me rezultatet pozitive.

Përtej statistikave, Teuta është e etur për pikë, i druheni durrsakëve?

Ne vlerësojmë çdo kundërshtar dhe së bashku me futbollistët që kam në dispozicion mundohemi të përgatitemi maksimalisht. Jo vetëm Teuta, por çdo ndeshje ashtu si çdo ekip ka objektivat e tij dhe mundohet të marrë sa më shumë pikë. I arrijnë apo ajo objektivat, është fusha ajo që e tregon. Kështu që nuk i druhem aspak Teutës sepse ne kemi objektivat tanë dhe do përpiqemi të bëjmë lojën tonë.

Nuk keni fituar asnjëherë kundër Edi Martinit, a do të jetë kjo sfidë edhe personale?

Nuk e shikoj sfidë personale, unë prirem t’i marr maksimumin vetes dhe lojtarëve që kam në dispozicion. Fokusi është fati i ekipit dhe jo statistikat e mia edhe pse unë jam pjesë e klubit.

Duamena duket se ka lënë boshllëk në sulm, a do të kemi afrime në merkaton e janarit?

Padiskutim që do të hyjmë në merkato për të afruar lojtarë në janar. Jemi duke shqyrtuar disa futbollistë me synimin për të përforcuar ekipin. Deri në merkaton e janarit kemi edhe disa ndeshje, ku çdo sfidë ka specifikat e saj. Ne do mundohemi t’i marrim ndeshjet një e nga një dhe më pas të shohim nga merkato.

Xhemajli nuk është stërvitur me skuadrën, do jetë gati për Teutën?

Xhemajli pësoi një dëmtim kundër Vllaznisë në kavilje dhe por të mos e rrezikuar nuk do ta ftoj për ndeshjen me Teutën. Fatmirësisht skuadra ka alternativa edhe pse rëndësia e Xhemajlit dihet. Jam i bindur dhe i sigurt se kushdo që do të luaj do të japë maksimumin për skuadrën.

Egnatia ka një mesatare prej 2.2 pikësh për ndeshje, po i respekton pritshmëritë skuadra?

Është një mesatare e mirë dhe futbollistët duhen përgëzuar për performancën e deritanishme. Gjykoj që me pak kujdes dhe pak fat, mund të kishim më shumë pikë. Jemi në vendin e parë prej javësh dhe në njëfarë mënyre, jemi në rrugën e duhur edhe pse kemi ende punë për të bërë.

Tri pikë më shumë se Partizani, a ju jep qetësi klasifikimi?

Qetësia gjithmonë ka qenë prezente te skuadra pasi ne jemi ndërtuar për të qenë lart në tabelën e klasif ikimit. Lojtarët janë të vetëdijshëm sa i takon objektivat të klubit, kështu që vëmendja është te Teuta. Kërkoj nga lojtarët që të zbatojnë ato që kemi analizuar gjatë javës dhe jam i bindur se do të dalim faqebardhë nga “Niko Dovana”.