Ndeshjet e raundit të parë të grupit 3 të kualifikueseve të Europianit U-17 “Shqipëri 2025“ që u organizuan nga FSHF nën mbikëqyrjen e UEFA-s përfunduan ditën e sotme.

Kombëtarja shqiptare U-17 fitoi ndaj Ishujve Faroe në stadiumin “Egnatia Arena”. Kuqezinjtë triumfuan 1-0 dhe golin e vetëm të takimit e shënoi sulmuesi Gabriel Kulla.

Ndeshja tjetër e grupit 3 Kroaci – Holandë, që u luajt në “Shtëpinë e Futbolli” u mbyll me fitoren e Kroacisë 3-1.

Trajneri Andrea Tedesco hodhi në fushë këtë formacion titullar në ndeshjen ndaj Ishujve Faroe: Raffaele Huli (GK), Darli Kurti, Lucas Cekrezi, Fabjano Nuhaj, Kris Gecaj (C), Ernesto Marqeshi, Andreas Llana, Serxhio Vogli, Rikardo Sheji, Gabriel Kulla, Emiljano Mihana.

Shqipëria e nisi mirë ndeshjen dhe dominoi në pjesën e parë, por pa mundur të gjente rrugën e rrjetës. Kuqezinjtë zhbllokuan rezultatin në minutën e 57-të me Gabriel Kullën. Sulmuesi shënoi një supergol nga goditja e dënimit dhe i dha avantazhin Shqipërisë.

Deri në fundin e ndeshjes rezultatin nuk ndryshoi pavarësisht se kuqezinjtë patën sërish disa mundësi të mira shënimi dhe ndeshja u mbyll 1-0 për Shqipërinë.

Një barazim, një humbje dhe një fitore, është bilanci i kuqezinjve të vegjël pas përfundimit të raundit të parë të kualifikueseve të Europianit U-17 “Shqipëri 2025“.

Finalet e Kampionatit Europian U-17 do të zhvillohen në Shqipëri në majin e vitit 2025, një ngjarje madhore që do të organizohet nga Federata Shqiptare e Futbollit dhe UEFA. Kombëtarja shqiptare është e kualifikuar automatikisht në finalet e këtij kompeticioni si vend pritës.

Grupi 3 – ndeshjet e raundit të parë të Kampionatit Europian 2025 për grupmoshën U-17

Shqipëri – Kroaci                     1-1
Hollandë – Ishujt Faroe         6-0

Shqipëri – Hollandë                0-5
Kroaci – Ishujt Faroe              7-0

Ishujt Faroe – Shqipëri           0-1

Kroaci – Hollandë                    3-1