Adrion Pajaziti ka lënë grumbullimin e Kombëtares dhe nuk do të jetë në dispozicion të Silvinjos për ndeshjen me Gjeorgjinë, që luhet të hënën ora 20:45. Është vetë FSHF që bën të ditur se lojtari është i skualifikuar për shkak kartonësh me skuadrën U-21.
Një gafë e pabesueshme kjo, pasi kujtojmë se Pajaziti ishte në dispozicion gjatë sfidës me Çekinë mbrëmë. 21-vjeçari ishte dhe surpriza e madhe nga trajneri Silvinjo në listën e publikuar për sfidat e këtij tetori.
Faksimile e protokollit të UEFA-s, pas ndeshjes Çeki-Shqipëri(2-0).
“Kombëtarja shqiptare udhëtoi mesditën e kësaj të shtune drejt Tbilisit në kuadër të ndeshjes ndaj Gjeorgjisë, që do të luhet të hënën e 14 tetorit në stadiumin “Mikheil Meskhi” në orën 18:00.
Departamenti i Komunikimit në FSHF bën me dije se me skuadrën nuk kanë udhëtuar të gjithë lojtarët e ftuar për këtë ndeshje. Mesfushori Adrion Pajaziti ka lënë grumbullimin në Pragë për shkak se është i skualifikuar nga kartonat me ekipin kombëtar U-21. Sipas rregullores së UEFA-s, mesfushori nuk mund të luajë me asnjë nga ekipet kuqezi në këto data.
Pas mbërritjes në hotel, skuadra ka bërë një seancë të lehtë në palestër, ndërsa nesër do të mbyllë edhe përgatitjet për këtë ndeshje. Kuqezinjtë do të zhvillojnë seancën zyrtare stërvitore në orën 18:00 në stadiumin që do të luhet ndeshja ndaj Gjeorgjisë, “Mikheil Meskhi”.
Sakaq, 30 minuta përpara seancës zyrtare stërvitore, trajneri Sylvinho dhe një nga lojtarët do të jetë në konferencën zyrtare për shtyp, në orën 17:30”.