Mesfushori i talentuar zviceran, Ardon Jashari, ka deklaruar hapur se nuk dëshiron më të jetë pjesë e Club Brugge, duke i dhënë një shtysë të madhe interesimit të AC Milan për shërbimet e tij.

Sipas asaj që raporton Nieuwsblad (përmes MilanNews), lojtari e ka bërë të qartë qëndrimin e tij: ai nuk ka më dëshirë të luajë për ekipin belg dhe është i vendosur të kërkojë një aventurë të re. Ky është një zhvillim që pritet të ndikojë ndjeshëm në ecurinë e negociatave, transmeton ORAinfo.

Lëvizja e radhës në “lojën e shahut”

Burime pranë klubit bëjnë me dije se një ofertë e re nga Milani është dërguar këtë fundjavë, dhe megjithëse nuk është refuzuar zyrtarisht, nuk është pritur me shumë entuziazëm nga drejtuesit e Brugge. Megjithatë, presioni nga lojtari mund të ndryshojë rrjedhën e ngjarjeve.Në këtë pikë, situata është e tensionuar për të gjitha palët:

Brugge duhet të vendosë nëse do të mbajë një lojtar të pakënaqur.Milani duhet të vendosë nëse do ta përshpejtojë lëvizjen.Dhe vetë Jashari kërkon qartësi për të ardhmen e tij.

Kush është Ardon Jashari?

22-vjeçari nga Zvicra shihet si një prej mesfushorëve më premtues të brezit të ri. Ai ka shkëlqyer me përfaqësuesen U21 të Zvicrës dhe ka grumbullime edhe me ekipin A, ndërsa në nivel klubesh ka tërhequr vëmendjen e shumë klubeve evropiane për shkak të inteligjencës në fushë dhe kapacitetit të lartë teknik.

Nëse marrëveshja konkretizohet, Jashari do të ishte një përforcim shumë i rëndësishëm për AC Milan, që synon të forcojë mesfushën për sezonin e ardhshëm.