Andre Onana po përgatit dalëngad alë nisjen e një jetë të re në Angli. Portieri është shumë pranë transferimit te Mançester Junajtidi, që pritet të dërgojë një tjetër ofertë në drejtim të zikaltërve brenda këtyre ditëve, me synimin e të gjitha palëve për ta mbyllur deri të enjten gjithë operacionin, kur Interi do të nisë grumbullimin.

Propozimi i Junajtidit pritet të mbërrijë në 60 milionë euro përfshirë këtu edhe bonuset që Marota kërkon, një shumë poshtë së cilës Interi nuk ka ndërmend të zbresë, me hendekun që tani duket se prek mënyrën si do bëhet pagesa. Juanjtidi kërkon të mbërrijë te shuma e kërkuar falë bonuseve të shumta, ndërkohë që Interi kërkon një shumë fikse më të lartë dhe më pak bonuse.

MANOVRAT E PORTIERIT – Siç kanë raportuar mediat italiane, para se Interi dhe Junajtidi të gjejnë akordin përfundimtar për kamerunasin, agjentët e këtij të fundit kanë takuar ditën e djeshme përfaqësuesit e klubit anglez, me të cilët kanë zgjidhur detajet e fundit në kontratën që pritet të firmoset deri të mërkurën. 27- vjeçari do të ketë një kontratë 5-vjeçare dhe pritet ende të zbulohet nëse do të jetë 4 vite me opsion rinovimi dhe për një tjetër vit, apo do të jetë e pandërprerë. Onana po ashtu ka rënë dakord për një rrogë prej 7 milionë eurosh në sezon, një shifër që do të jetë më shumë se dyfishi i asaj që përfitonte tek Interi.

Nga kontrata aktuale deri në 2027-ën, që u firmos një vit më parë kur mbërriti në Milano, portieri përfitonte “vetëm” 3 milionë euro në sezon dhe kjo pritet të jetë një nga arsyet e transferimit të tij në Angli, edhe pse duhet thënë që ishte Interi që e nxori në shitje lojtarin, me synimin për të arkëtuar shumën e duhur për operacionet në hyrje të merkatos. Në vazhdën e të gjitha manovrave për t’u gjetur sa më i përgatitur, Onana është edhe në kërkim të një shtëpie ne Mançester dhe zona është pikërisht ajo pranë “Carrington”, qendrës stërvitore të “djajve të kuq”, ku portieri do të rikthehet shumë shpejt, pas përfundimit të fazës përgatitore të klubit në SHBA.