Tirana ka siguruar kualifikimin në turin e dytë të Ligës së Konferencës, pasi ka marrë një fitore të merituar në Gjeorgji ndaj Dinamo Batumi.  Pas barazimit 1-1 në ndeshjen e parë, bardheblutë kanë fituar 2-1 në transfertë dhe kanë siguruar biletën për turin tjetër.

DINAMO BATUMI-TIRANA 1-2
90′ Kapanadze / 28′ Lushkja, 78′ Deliu

NGJARJET KRYESORE:

90’+12’ Mbyllet ndeshja me fitoren 2-1 të Tiranës.

90’+6’ Driblim spektakolar i Haxhiut i cili hyn i vetëm në zonë, por portieri e ndalon gjuajtjen e tij.

90’+5’ Harkime radhazi në zonën e bardhebluve, vendasit shtyjnë për të gjetur golin e barazimit.

90’ Jepen 8 minuta shtesë.

90’ Vendasit shkurtojnë diferencën! Kapanadze ia del të shënojë me një devijim në shtyllën e dytë.

87’ Kapanadze gjuan në pozicion ballor, Selmani kontrollon në dy kohë topin.

86’ Harkim i rrezikshëm në zonën e bardhebluve, Selmani del dhe mbërthen sferën.

84’ Abazaj i lë vendin në fushë Lulajt, me Shehin i cili mendon të përforcojë prapavijën.

83’ Vasatdze rrezikon seriozisht me një gjuajtje me kokw në qendër të zonës, por nuk gjen katërkëndorin.

81’ Edhe Doka ndëshkohet me karton të verdhë për një faull në mesfushë.

79’ Deliu ndëshkohet me karton të verdhë pasi ka hequr fanellën te festimi i golit.

78’ GOOOL TIRANA! Bardheblutë dyfishojnë shifrat me një aksion thuajse identik me Deliun.

76’ Zaria gjuan përsëri në hyrje të zonës, duke mos gjetur portën e Selmanit.

75’ Deliu merr vendin e Lushkjes në radhët e bardhebluve.

72’ Tsitaishvili në të djathtën del në pozicion dhe gjuan, por gjen përgjigjen e Selmanit i cili devijon topin në shtyllë.

67’ Haxhiu merr vendin e Latifit në minutat e fundit të ndeshjes.

65’ Traversa shpëton bardheblutë! Një gjuajtje ballore e Zarias ndalet vetëm nga shtylla e sipërme e portës së Selmanit.

62’ Teidi ndal në mënyrë të parregullt Latifin dhe ndëshkohet me karton të verdhë. Bardheblutë kërkojnë të kuq por gjyqtari nuk ndryshon mendje.

60’ Hila ndëshkohet me karton të verdhë pas një faulli ndaj Flamarion në mesfushë.

58’ Top në thellësi për Vatsadze, ky i fundit nuk arrin të devijojë para Selmanit dhe sfera shkon në këndore.

58’ Litvinenko lë fushën e lojës për vendasit, teksa në fushë futet Çabradze.

53’ Hasani nga e djathta provon përsëri me një gjuajtje të fortë, këtë herë tokazi me të majtën, por Çickan grushton duke larguar sferën nga katërkëndori.

52’ Bardheblutë kontrollojnë me qetësi çdo lloj tentative të gjeorgjianëve, të cilët luajnë në mënyrë të avashtë dhe i japin kohë prapavijës së ekipit të Shehit që të jetë gjithmonë e vendosur.

46’ Pjesa e dytë nis me Bidzinashvilin që qëndron në dhomat e zhveshjeve për vendasit, me Vatzadze i cili hyn në fushën e lojës.

45’+5’ Mbyllet pjesa e parë me avantazhin bardheblu.

45’+4’ Predhë e Hasanit në hyrje të zonës, portieri i vendasve shpëton mrekullisht nga goli i dytë.

45’+3’ Pas harkimit të Latifit, sfera shkon në shtyllën e dytë ku Teidi largon me vështirësi për të shmangur një gjuajtje në portë.

45’+3’ Hila provon me një gjuajtje të fortë nga distanca, sfera devijohet në këndore.

45’+2’ Hoxhallari dhe Doka largojnë një rrezik para portës, pasi bllokojnë hapësirën për Litvinenkon i cili ishte nisur drejt katërkëndorit por i jep mundësinë mbrojtësit të djathtë të largojë sferën.

45’ Jepen 4 minuta shtesë.

42’ Vertikalizim i rrezikshëm i vendasve me Flamarion i cili shfaqet para Selmanit dhe rrëzohet pas një kontakti në zonë. Por gjyqtari ndalon aksionin për pozicion jashtë loje të brazilianit.

41’ Tsitaishvili tenton të shpërthejë në krahun e djathtë të sulmit, por Përgjoni e shoqëron derisa futbollisti i vendasve nxjerr topin në fundore.

38’ Litvinenko gjuan përsëri nga jashtë zonës, duke gjetur devijimin e mbrojtësve bardheblu që çojnë topin në këndore.

36’ Flamarion nga e majta krijon probleme në zonën e bardhebluve duke tërhequr tre mbrojtës, por Zaria pas tij nuk përfiton dhe Najdovski i heq sferën nga këmbët.

29’ Litvinenko gjen hapësirën për të rrezikuar portën bardheblu teksa tenton të dërgojë në rrjetë një top të kthyer nga mbrojtja, por sfera përfundon jashtë.

28’ GOOOL TIRANA! Aksion perfekt në të djathtë, topi shkon në qendër te Lushkja i cili i jep avantazhin bardhebluve.

26’ Hila rrëmben topin në krahun e majtë dhe harkon në qendër për Hasanin, mbrojtja vendase largon pa i dhënë mundësinë të gjuajë në portë.

25’ Abazaj nga e majta pason për Latifin për të nisur një kundërsulm të shpejtë, por pasimi i këtij të fundit nuk gjen askënd në zonë.

22’ Qarkullim i gjatë i topit nga skuadra vendase, e cila gjithsesi nuk ia del që të fitojë hapësira për të rrezikuar para portës së Selmanit.

18’ Bidzinashvili nga e majta gjen hapësirën të krosojë në qendër, aty ku Hoxhallari ndal rrezikun para Selmanit, duke i dhënë mundësinë këtij të fundit të mbërthejë sferën.

13’ Tsitaishvili nga e djathta harkon në zonë, por Najdovski largon me kokë duke mos lejuar rrezik para Selmanit.

12’ Një top i kthyer mbrapa vë në vështirësi portierin Çiçkan, por Latifi nuk ia del të prekë topin para portierit i cili spastron para zonës së tij.

9’ Zëvendësim i detyruar për vendasit, pasi Baliç largohet i dëmtuar, duke i bërë vend Rekhviashvilit.

7’ Litvinenko tenton një harkim në zonë nga një goditje dënimi, Selmani del dhe kontrollon sferën.

2’ Menjëherë shfaqet rrezikshëm Tirana me një aksion në krahun e majtë, por topi në qendër për Abazajn largohet nga mbrojtja vendase.

1′ Nis dueli në Batumi.