Tirana ka marrë tre pikë shumë të rëndësishme sot me një fitore 3-1 përballë Skënderbeut në “Selman Stërmasi”.

Korçarët bënë befasinë në startin e ndeshjes duke gjetur shpejt avantazhin me Nikajn dhe duke ia bërë punën më të vështirë bardhebluve të cilëve iu desh kohë që të reagonin. Përballë miqve të rreshtuar mirë në mbrojtje, barazimi erdhi vetëm në minutat e fundit, kur Kaina me kokë mposhti portierin Alia.

Në pjesën e dytë, sfida ishte e hapur dhe të dy palët patën mundësi për të shënuar. Por në fund ai që zgjidhi ndeshjen ishte Qefalija, i cili me një gjuajtje të devijuar mposhti për herë të dytë portierin e korçarëve. Në shtesën e sfidës, me korçarët në sulm, Hasani gjeti hapësirën për të shënuar edhe golin e rezultatit 3-1 duke vulosur fatin e ndeshjes.

Kështu, Tirana ndal kryesuesit dhe u merr vendin e parë, duke qenë pak më e qetë pas hapit të gabuar në javën e dytë në Durrës.

TIRANA 3-1 SKËNDERBEU
44′ Kaina, 77′ Qefalija, 90’+8′ Hasani / 2′ Nikaj

NGJARJET KRYESORE:

90’+8’ Mbyllet ndeshja me fitoren 3-1 të Tiranës.

90’+8’ GOOOL TIRANA! Vjen edhe goli që vulos ndeshjen, me Hasanin i cili kontrollon në zonë dhe lëshon një gjuajtje të pakapshme për portierin Alia.

90’+5’ Karton i verdhë për Kaina, pas një faulli në një duel ajror.

90’+3’ Muharem gjuan nga distanca, pa shqetësuar Likën pasi sfera kalon shumë larg portës.

90’ Jepen 7 minuta shtesë.

84’ Lika ka mundësinë të rrezikojë portën e Tiranës me një kundërsulm të shpejtë, por portieri Lika del nga zona dhe me këmbë i ndërhyn duke bllokuar sferën. (VIDEO)

83’ Muharem merr vendin e Ramos te Skënderbeu.

80’ Abazaj merr vendin e Latifit te Tirana.

78’ Mesfushori ndëshkohet me karton të verdhë për festën me ultrasit bardheblu.

77’ GOOOL TIRANA! Qefalija përfiton nga një top i mbetur në zonë dhe gjuajtja e devijuar mposht portierin Alia. (VIDEO)

75’ Fleçer tenton me një gjuajtje të fortë nga jashtë zonës, shënjestra nuk është e duhura.

71’ Zëvendësim i dyfishtë te korçarët, pasi Fleçer dhe Lika hyjnë në fushë në vend të Nikajt dhe Rashicës.

70’ Latifi nis përsëri një harkim nga e majta në shtyllën e dytë për Hasanin. Ky i fundit kontrollon por nuk ia del të gjejë katërkëndorin me tentativën e tij. (VIDEO)

66’ Largohet nga fusha Hila te Tirana, për t’i bërë vend Qefaliajt.

65’ Momente tensioni pasi ultrasit bardheblu hedhin shishe në fushë. Në fund gjyqtari nxjerr një karton të verdhë për portierin Alia.

65’ Pecani merr vendin e Juri në radhët e Skënderbeut.

64’ Liço provon me një gjuajtje nga jashtë zonës, sfera nuk gjen katërkëndorin.

62’ Hasani tenton tokazi të gjejë rrjetën nga jashtë zonës, Alia mbërthen pa probleme sferën.

59’ Brenda pak çasteve janë Mici dhe Shaqe të cilët ndëshkohen me karton të verdhë.

58’ Latifi nga e majta sulmon rrezikshëm dhe nis topin në qendër, Kaina nuk devijon para portierit. (VIDEO)

56’ Hasani gjen hapësirën para zonës dhe lëshon një të majtë të fortë, topi del jashtë, jo shumë larg kryqëzimit të shtyllave. (VIDEO)

53’ Situata zhvendoset në anën tjetër ku Doka provon të hyjë në zonë me një depërtim, por ndalet nga Dumfur. Mbrojtësi kërkon penallti, por gjyqtari nuk e mendon njëlloj. (VIDEO)

52’ Mici merr vendin e Hoxhallarit, i cili ka probleme me një dëmtim në shpinë.

52’ Traversa shpëton bardheblutë! Një gjuajtje e Juri ndalet vetëm nga traversa dhe më pas Rashica fluturon sferën shumë lart mbi portë. (VIDEO)

49’ Të dy palët mundohen që të krijojnë mundësi shënimi, por pa shumë sukses pasi çdo aksion thyhet pranë zonës.

46’ Pjesa e dytë nis pa zëvendësime nga të dy ekipet.

45’+5’ Mbyllet me barazimin 1-1 pjesa e parë e ndeshjes.

45’+4’ Liço driblon në zonën bardheblu, por ndërhyrja e Lulajt në momentin e fundit shmang daljen e tij para Likës.

45’ Jepen 5 minuta shtesë.

44’ GOOOL TIRANA! Shënon Kaina me kokë pas një harkimi nga e majta i Përgjonit. (VIDEO)

43’ Nikaj ndëshkohet me karton të verdhë pas protestave ndaj gjyqtarit për një faull në sulm ndaj Lulajt.

42’ Latifi nga e majta tenton të nisë Hasanin në krahun e djathtë por i jep më shumë forcë se sa duhet topit që shkon në fundore.

38’ Liço ndëshkohet me karton të verdhë për një faull ndaj Jonuzit në gjysmëfushën kundërshtare.

34’ Hoxhallari tenton me një goditje dënimi pranë zonë së rreptësisë korçare, sfera kalon murin por ndalet nga portieri Alia. (VIDEO)

27’ Ndalesa për t’u freskuar lojtarët dhe dëmtimet në këto minuta kanë ulur ritmin e ndeshjes, me korçarët që thjesht po mendojnë që të mbajnë sa më larg katërkëndorit vendasit.

21’ Tjetër top në thellësi për Latifin, Frashëri e bllokon dhe Alia mbërthen sferën në tokë.

18’ Latifi tenton me goditjen e dënimit, por sfera ndalet nga muri. Bardheblutë vazhdojnë aksionin me harkime nga krahët, pro në të dy rastet është mbrojtja që largon rrezikun para portierit Alia.

17’ Ramos ndëshkohet me karton të verdhë pas një faulli ndaj Lushkjes, shumë pranë kufijve të zonës së rreptësisë së korçarëve.  .

13’ Bardheblutë janë ato që kanë kontrollin e plotë të manovrës teksa tentojnë vazhdimisht të gjejnë hapësira për të rrezikuar me harkime, por korçarët janë të vëmendshëm në prapavijë,.

9’ Hasani merr topin në krahun e djathtë, shmang Dumfur dhe gjuan, por Alia devijon me një reagim të shkëlqyer. (VIDEO)

7’ Një harkim interesant gjen Latifin në zonë, Ramos largon rrezikun duke shkelmuar sferën.

5’ Përsëri rrezikshëm korçarët, me Rashicën i cili nga e djathta hyn në zonë dhe gjuan në diagonale, pro gjen vetëm rrjetën e jashtme. (VIDEO)

2′ GOOOL SKËNDERBEU! Nikaj kalon në avantazh miqtë me një aksion personal. (VIDEO)